«На связи» форумри сӑн

Сӗнтӗрвӑрри округӗнчи Кӗтӗквар ялӗнче юпа уйӑхӗн 1-мӗшӗнченпе шыв ҫук. Ҫавна май унта хатӗр тӑмалли режим пулнине палӑртнӑ. Вӑл ӗнертенпе, юпа уйӑхӗн 14-мӗшӗнченпе, вӑйра.

Мӗн пулнӑ-ха унта? Юпан 1-мӗшӗнче ялти шыв башнинче авари пулнӑ. Юпан 6-мӗшӗнче Сӗнтӗрвӑрри округӗн пуҫлӑхӗ Владимир Петров лару-тӑрӑва сӑнаса тӑнине пӗлтернӗ. Башньӑна юсанӑ чухне яла таса шыв кӳрсе тӑраҫҫӗ имӗш. Ку тӗрӗсех-и е ҫук-и – ҫапах ял ҫыннисем тӗнче тетелӗнчи пост айне влаҫ ӗҫне критиклесе ҫырнӑ.

www.cap.ru сӑнӳкерчӗкӗ

Чӑваш Енӗн Ял хуҫалӑх министерстви качакапа сурӑх ӗрчетекенсене субсиди парассине пӗлтернӗ.

Укҫана тивӗҫес текенсенчен заявкӑсене авӑн уйӑхӗн 18-мӗшӗнчен йышӑнма пуҫлӗҫ. Документсене авӑн уйӑхӗн 25-мӗшӗнчи ҫурҫӗрччен парса ӗлкӗрмелле.

Субсиди валли пурӗ 2,4 млн тенкӗ пӑхса хӑварнӑ.

Тӗплӗнрех пӗлес тесен Ял хуҫалӑх министерствипе ҫыхӑнмалла.

cap.ru сӑнӳкерчӗкӗ

Чӑваш Енре шӑпӑрлансене пӗчӗкрен ҫӗр ӗҫне хӑнӑхтараҫҫӗ. Ку вӑл ахальтен мар ӗнтӗ.

Лаша пуласси тихаран паллӑ, ҫын пуласси ачаран тесе каланӑ ваттисем.

Чӑваш Енре ачасене ял пурнӑҫне тата ял хуҫалӑхӗнчи ӗҫе юратма хӑнӑхтарас тесе ача пахчисенче агролабораторисем уҫнӑ. Паянхи куна ун пекки 137 ача пахчинче пур.

Проекта 146 аграри предприятийӗ, кооперативсемпе фермерсем хутшӑнаҫҫӗ.

Аграри лабораторийӗсем Ҫӗрпӳ тӑрӑхӗнче – 19, Муркаш тӑрӑхӗнче — 12, Шупашкар тӑрӑхӗнче – 10.

cap.ru сӑнӳкерчӗкӗ

Шупашкар районӗнчи Атайкассинче пурӑнакансен шучӗ ӳссе пырать. Паян унта 1520 ҫын пурӑнать иккен. 2020 ҫултипе танлаштарсан ку вӑл чӗрӗк пай чухлӗ нумайрах.

Хула ҫывӑхӗнчи ял аталанӑвӗпе республика Элтеперӗ Олег Николаев паллашнӑ. Халӑх йышланни, Чӑваш Ен Элтеперӗн Администрацийӗн пресс-служби шухӑшланӑ тӑрӑх, республика ертӳҫисем ял пурнӑҫне лайӑхлатма тӑрӑшнипе ҫыхӑннӑ.

Унта 2020 ҫулта уҫнӑ 110 ачалӑх ача пахчи ӗҫлет, ача пахчинче вара агролаборатори те пур. Агролабораторире шӑпӑрлансене ҫӗр ӗҫӗпе паллаштараҫҫӗ.

"Контактри" сӑн

Етӗрне округӗнчи Талуй ялӗнче «Ялти чи лайӑх пулӑҫ» конкурс иртнӗ. Ӑна пӗрремӗш хут йӗркеленӗ.

Чи нумай пулӑ тытакансем Демид Васильев тата Даниил Голицын пулнӑ. Вӗсен вӑлтине 13 пулӑ ҫакланнӑ.

Иккӗмӗш вырӑнта – Татьяна Григорьева. Виҫҫӗмӗш вырӑна вара Даниил Яковлев. Ҫӗнтерӳҫӗсене спонсорсенчен парнесем лекнӗ.

Красноармейски районӗн халӑх тетелӗнчи страницинчен илнӗ сӑнӳкерчӗк

Красноармейски районӗнчи Тватпӳрт ялӗнче халаха пухӑнмалли сурт туса лартнӑ.

Пӗчӗк ял ҫыннисем питех те хастар. Ялта 35 кил ҫеҫ пулин те вӗсем тӑван тӑрӑхне аталантарма тӑрӑшаҫҫӗ. Варвара Васильевна староста ертсе пынипе тӗрлӗ ӗҫ пуҫараҫҫе. Нумаях пулмсть вӗсем ктлсерен каштахшер укҫа пухса, хыснаран укса илсе халаха пухӑнмалли ҫурт туса лартнӑ.

Ялти хастарсем тӑрӑшнипе унта юлашки тӑватӑ ҫӳлта киве шыв башнине ылмаштарнӑ, шыв пӑрӑхне ҫӗнӗрен хурса тухнӑ, ҫӗнӗ каҫӑ тунӑ.

Красноармейски районӗн халӑх тетелӗнчи страницинчен илнӗ сӑнӳкерчӗк

Красноармейски районӗнчи Еншик Чуллӑ ялӗнче пурӑнакансем тӑван тӑрӑхри «Еншик» ҫӑла юсанӑ.

Асӑннӑ тӑрӑхри ветерансен канашӗн председателӗ Нина Петрова пуҫарнӑ ку ӗҫе. Ялти хастар ҫын сӑмахне ҫынсем итленӗ.

Нина Петрова шухӑшланӑ тӑрӑх, Еншик ял историйӗпе тӳрремӗнех ҫыхӑннӑ. Еншик Чуллӑна чӑвашсем 14 ӗмӗрте туиар-монголсенчен тарса пырса тӗпленнӗ. Кунти вӑрманлӑ та ҫырмаллӑ вырӑнта ҫӑл та нумай ҫӗрте тапса тӑнӑ.

Куҫса килнисен ертӳҫине Еншик тесе чӗннӗ-мӗн. Ҫӑла ун ячӗпе Еншик теме пуҫланӑ.

«Чувашский край» сӑнӳкерчӗкӗ

Красноармейски районӗнчи Йӗпремре пӗвене ҫӑтмаха ҫавӑрнӑ.

«Ку вӑл Турцире мар, Крымри курорт та мар. Ялти курорт Красноармейски тӑрӑхӗнчи Йӗпремре вырнаҫнӑ», — тесе пӗлтернӗ «Чувашскй край» пабликра.

Пӗвене йӗркене кӗртекенӗсем — ял ҫыннисем тата вырӑнти администраци иккен.

Унта пальма (паллах, чӑн-чӑнни мар ӗнтӗ. Вӑл пирӗн патра ӳсмест), шезлонг, зонт таранах вырнаҫтарнӑ.

Сӗнтӗрвӑрри районӗнчи Туппай Сӗмӗл ялӗнче чылай вӑхӑт шывсӑр ларнӑ. Ҫавӑн пирки тӗнче тетелӗнче те пӑшӑрханса ҫыракансем пулнӑ. Пӑтӑрмах пирки пӗлсен вырӑнти прокуратура тӗрӗслев ирттерме йышӑннӑ.

Ялта ака уйӑхӗн 28-мӗшӗнчен пуҫласа ҫу уйӑхӗн 7-мӗшӗччен шыв пулман. Унӑн сӑлтавӗ — шыв башнин насусӗ ҫунса кайни.

Прокуратура тӗрӗсленӗ хыҫҫӑн «Мариинский» муниципалитетӑн унитарлӑ предприятийӗ ҫине тӑманнине палӑртнӑ. Уншӑн предприяти директорӗн тивӗҫӗсене пурнӑҫлакана административлӑ майпа явап тыттарса штрафлама йышӑннӑ. Унсӑр пуҫне шыв укҫине ҫӗнӗрен шутласа пама хистенӗ.

chgign.ru сӑнӳкерчӗкӗ

Чӑваш патшалӑх гуманитари ӑслӑлӑхӗсен институчӗн историпе енӗпе ӗҫлекен ӑслӑлӑх ӗҫченӗн Е.В. Сергееван «Чувашское сельское сообщество во второй половине XIX – начале XX века в половозрастном измерении» кӗнеки пичетленсе тухнӑ.

Унта XIX ӗмӗрӗн иккӗмӗш ҫурринчи - XX ӗмӗрен пуҫламӑшӗнчи чӑваш ялӗсенчи пурнӑҫ ҫинчен каласа кӑтартнӑ. Этнографие тата ял ҫемйинчи социаллӑ тытӑма уйрӑмах тимлӗх уйӑрнӑ.